Asosiy menu

"O`zdonmahsulot" AK yangiliklari

Top menejerlar uchun korporativ boshqaruvning zamonaviy uslublari

Top menejerlar uchun korporativ boshqaruvning zamonaviy uslublari

O‘zbekiston Respublikasi Prezidentining “Aksiyadorlik jamiyatlarida zamonaviy korporativ boshqaruv uslublarini joriy etish chora-tadbirlari to‘g‘risida” 2015 yil 24 apreldagi PF-4720 farmoni, “O‘zbekiston Respublikasi va Germaniya Federativ Respublikasi o‘rtasidagi iqtisodiy hamkorlikni yanada kengaytirish chora-tadbirlari to‘g‘risida”gi 2015 yil 12 martdagi PQ-2316-sonli Qarori hamda biznesni boshqarish va korporativ boshqaruv sohasida yuqori malakali mutaxassislarni tayyorlash va qayta tayyorlashni yanada takomillashtirish va sifatini oshirish, iqtisodiyot sohasi va tadbirkorlik tuzilmalarini biznes-jarayonlarini samarali boshqarish masalalarini zamon talablari asosida boshqaruv qobiliyatiga ega boshqaruv kadrlari bilan ta'minlash maqsadida Vazirlar Mahkamasining 2015 yil 26 avgustdagi 659-f-sonli farmoyishi qabul qilindi. Mazkur Farmoyishga asosan Vazirlar Mahkamasi huzuridagi Oliy biznes maktabi tomonidan (ESMT) Yevropa menejment va texnologiyalar maktabi bilan hamkorlikda “Top menejerlar uchun korporativ boshqaruvning zamonaviy uslublari” mavzusida tashkil qilingan o‘quv kurslarida “O‘zdonmahsulot” AK va tarkibdagi korxonalardan jami 10 nafar xodim malakalarini oshirib, tegishli sertifikatlarga ega bo‘ldilar. Shuningdek, 8 nafar xodim o‘quv kurslarini Germaniya Federativ Respublikasida davom ettirish imkonini qo‘lga kiritishdi. Manba: Axborot xizmati.

Yangi makaron sexi qurib ishga tushirildi

Yangi makaron sexi qurib ishga tushirildi

O‘zbekiston Respublikasi Prezidentining 2014 yil 17 noyabrdagi PQ-2264-sonli qaroriga asosan “O‘zdonmahsulot” AK tizimidagi “Koson DMKK” MCHJ tomonidan Qarshi tumanida “TFQ” kompaniyasining zamonaviy texnologiyasi asosida yangi makaron sexi qurib ishga tushirildi. Buning hisobiga yangi turdagi mahsulotlar ishlab chiqarilishi yo‘lga quyilib, 20 ta yangi ish o‘rinlari tashkil qilindi.

Barqaror iqtisodiy taraqqiyotning muhim omili

Barqaror iqtisodiy taraqqiyotning muhim omili

Mamlakatimizning barqaror iqtisodiy taraqqiyotini ta’minlash va kelajakda rivojlangan davlatlar qatoriga kirishi iqtisodiyotning nomoliyaviy sektoriga ichki mablag‘lar va chet el investitsiyalarini jalb etishga qodir samarali moliya bozorini shakllantirish bilan chambarchas bog‘liq. Bugungi sharoitda investitsiya va pay fondlari iqtisodiyotni moliyalashtirish manbalaridan biridir. Ular yordamida fond bozoriga mablag‘lar oqimi, jumladan, investitsiya jarayoniga aholi jamg‘armalarini jalb etish ko‘paymoqda. Prezidentimiz Islom Karimov tomonidan ilgari surilgan Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasiga muvofiq ishlab chiqilgan va shu yilning 25-avgustida qabul qilingan “Investitsiya va pay fondlari to‘g‘risida”gi qonun bu borada alohida ahamiyatga ega.

Islohotlar – farovonlik omili

Islohotlar – farovonlik omili

Prezidentimiz rahnamoligida amalga oshirilayotgan keng ko‘lamli islohotlar inson manfaatlarini ta’minlash, xalqimiz farovonligini yuksaltirish va ezgu maqsadlarini ro‘yobga chiqarishga xizmat qilmoqda. Buni poytaxtimizning Sergeli tumani misolida ham ko‘rish mumkin. Joriy yilning o‘tgan sakkiz oyida ushbu maqsadlarga 3 milliard 221 million so‘m yo‘naltirildi. Kichik biznes va xususiy tadbirkorlikni rivojlantirish, oilalarga manzilli ijtimoiy yordam ko‘rsatishga alohida e’tibor qaratilayotir. – Xususiy sektorni har tomonlama qo‘llab-quvvatlash va rag‘batlantirish tadbirkorlikni rivojlantirishda muhim omil bo‘lmoqda, – deydi tuman hokimi Furqat Maqsudxo‘jayev. – Joriy yil boshidan buyon tumanimizda 51 kichik biznes va xususiy tadbirkorlik subyekti tashkil etildi. Jalb qilingan investitsiyalar umumiy hajmi 41 milliard 700 million so‘mni tashkil etdi. Soha vakillariga 22 milliard so‘mdan ziyod kredit ajratildi. Bu o‘tgan yilning shu davriga nisbatan 5 milliard so‘mga ko‘pdir. Buning samarasida metall quyish, avtomobil moyini qadoqlash korxonalari va sog‘lomlashtirish markazi tashkil etildi. Chet el investitsiyalari jalb etilgan “Azamat servise group” korxonasida avtomobillar uchun antifrizlar ishlab chiqarilmoqda. Shuningdek, yodlangan tuz, qurilish materiallari va kimyoviy mahsulotlar, santexnika buyumlari va mebel ishlab chiqarish yo‘lga qo‘yildi. Buning samarasida 1100 dan ortiq yangi ish o‘rni yaratildi.

Bugungi harakat – ertangi barakot

Bugungi harakat – ertangi barakot

Namangan viloyatining Yangiqo‘rg‘on tumanida 2016-yil hosili uchun kuzgi don ekinlari ekishning dolzarb vazifalariga bag‘ishlangan ko‘rgazmali seminar o‘tkazildi. Viloyat hokimligi mas’ul xodimlari, davlat va jamoat tashkilotlari rahbarlari, tuman hokimlari, qishloq va suv xo‘jaligi boshqarmasi va uning tuman bo‘limlari rahbar va mutaxassislari, fermerlar va ularga xizmat ko‘rsatuvchi korxona-tashkilotlar vakillari ishtirok etgan tadbirda agrotexnik tadbirni o‘z vaqtida va sifatli tashkil etish mo‘l hosil olishning muhim omili ekani ta’kidlandi. Joriy yilda Namangan viloyatida 79 ming gektar maydonga g‘alla ekish rejalashtirilgan. Bu ishlar uchun 19 ming 750 tonna urug‘lik, 3 ming 47 tonna yoqilg‘i-moylash materiallari va 2 ming 660 tonna mineral o‘g‘it zarur bo‘ladi.

G‘alla ekish boshlandi

G‘alla ekish boshlandi

Bu yil g‘alladan ulkan xirmon ko‘targan Qoraqalpog‘iston Respublikasi dehqonlari kelgusi yil hosili uchun kuzgi bug‘doy ekish ishlarini boshlab yubordi. Joriy yilda Ellikqal’a tumanida 3 ming gektar maydondan shartnomada belgilangan 5 ming 530 tonna o‘rniga 6 ming 300 tonnalik ulkan xirmon uyildi. Kelgusi yili bundan-da mo‘l hosil olishni maqsad qilgan tuman mirishkorlari 3 ming gektar maydonning 1 ming 700 gektariga ochiq dalada, 1 ming 300 gektariga g‘o‘za qator oralarida bug‘doy ekishni rejalashtirgan. Shu munosabat bilan tumanning Aqchako‘l ovulidagi “Shonazar-Otanazar” fermer xo‘jaligi dalasida ko‘rgazmali seminar o‘tkazildi. Qishloq xo‘jaligi mutaxassislari, fermerlar, ularga xizmat ko‘rsatuvchilar ishtirok etgan tadbirda yerni ekishga tayyorlash, urug‘ sepish, sug‘orish va oziqlantirish ishlarining me’yorida amalga oshirilishi o‘simlikni qishning sovug‘iga tayyorlash va bahorda tekis nihol olishning muhim omili ekani ta’kidlandi. – Bu yil asosan bug‘doyning iqlim sharoitimizga mos “Krasnodar-99” va “Zimnitsa” navlarini ekamiz, – deydi tuman qishloq va suv xo‘jaligi bo‘limi agronomi Olimboy Seytimbetov. – Ekish ishlarini uyushqoqlik bilan olib borish niyatida tuzilgan 12 otryadga 124 yuqori unumli texnika biriktirildi. Kuzgi bug‘doy ekishni barcha agrotexnika qoidalariga rioya qilgan holda 25-sentabrga qadar tugallashni rejalashtirganmiz. Kelgusi yil hosili uchun bug‘doy ekish ishlari To‘rtko‘l, Beruniy va Amudaryo tumanlarida ham boshlab yuborildi.